Говор на Ректорот

Драги студенти,

Голема чест ми е да ве пречекам во Универзитетот на Југоисточна Европа на почетокот на оваа нова академска година. Денес започнува едно важно патување за вас-кон учење, откривање и личен развој. Започнувате не само студии, туку и едно ново поглавје во вашиот живот. Одлуката да продолжите со образованието бара храброст, амбиција и одговорност и ние сме почестени што го избравте нашиов Универзитет како ваш академски дом. 

Нашиов Универзитет е основан со јасна мисија: да обезбеди квалитетно образование, да поттикнува иновации и да ги подготви младите луѓе да придонесат позитивно во своите заедници и во поширокиот свет. Тука ќе најдете не само професори и ментори, туку и можности за истражување, за создавање и за развој. 

УЈИЕ е универзитет што ја промовира разновидноста. Со студии на три јазици – на албански, на македонски и на англиски - ние сме горди што нашето студентско тело ја одразува богатата различност на нашиов регион и пошироко. Меѓу вас има млади луѓе од Северна Македонија и од соседните земји, студенти од дијаспората кои се враќаат од Европа во потрага по своите корени, како и меѓународни студенти кои доаѓаат од далечни места за УЈИЕ да им стане академски дом. Оваа разновидност на јазици, култури и искуства е тоа што го прави нашиов Универзитет уникатен, и тоа што ќе го направи вашето време тука побогато и посмислено. 

Вие нема да го поминувате овој пат сами. Професорите, асистентите, студентските советници и целиот академски и административен кадар се тука за да ве поддржат, да ве предизвикаат и да ве водат за да извлечете најмногу од вашите години со нас. Надвор од училниците, ќе имате можност да учествувате во практична настава, да ги развивате вашите идеи преку стартап можности и да студирате во странство преку програмите Erasmus+. Нашето активно Студентско собрание и асоцијација ќе се погрижат животот на кампусот да биде динамичен, привлечен и полн со можности за меѓусебно поврзување.

Додека чекорите низ нашиот кампус, сетете се дека овие години ќе го оформат не само вашето знаење, туку и вашиот карактер. Ќе создадете нови пријателства, ќе се соочите со предизвици и ќе откриете сили кои можеби досега не сте знаеле дека ги имате. Искористете го ова време максимално—бидете љубопитни, отворени и никогаш не двоумете се да поставите прашања.

Но запомнете: вашиот успех зависи од вас. Бидете присутни на предавањата, учествувајте активно и искористете ја секоја можност за учење - не само од книгите, туку и од дискусиите, тимската работа и различните перспективи што ќе ги сретнете овде. УЈИЕ поставува високи стандарди затоа што верува во вашиот потенцијал, и очекува од вас да ги постигнете тие стандарди со посветеност. Во исто време, ова се најубавите години во вашиот живот. Балансирајте ги академските обврски со пријателството, креативноста и радоста. Живејте ги овие години целосно, затоа што тие ќе влијаат врз тоа кој ќе станете по дипломирањето.

Во име на целиот Универзитет, ви посакувам успех, инспирација и едно незаборавно патување пред вас. Добредојдовте во големото семејство на Универзитетот на Југоисточна Европа.

Ви благодарам!