COVID-19 Information and Protocol

Login

Anëtarët e stafit duhet të përdorin llogarinë e tyre Webmail për identifikim.

Universiteti i Evropës Juglindore
jetëso dijen tënde!

Fjala e Rektorit

Të dashur studentë,

I nderuar staf,

Vitin i ri akademik 2020/21, në kushtet e pandemisë Kovid-19, e fillojmë si asnjëherë më parë, përplot sfida shëndetësore, por edhe sprova për ballafaqimin e menaxhimin e kujdesshëm të situatës.

Me moton shëndeti në rend të parë“, si për studentët, stafin ashtu edhe komunitetin përreth, përveç përkujdesjes institucionale, duhet të kemi nivelin e lartë të ndërgjegjes për situatat dhe sfidat që na presin në normalizimin e jonormales. Sjelljet tona në kampuse, në punë, në shtëpi, si dhe në mjediset komunitare, duhet të përputhen me rreziqet ekzistuese, që i ka shkaktuar virusi kaq i paparashikuar. Por, ne së bashku, si edhe deri më tani do t’ia dalim dhe do të qëndrojmë së bashku dhe me sa më pak pasoja për shëndetin tonë.

Të vetëdijshëm për rreziqet, institucionalisht i kemi bërë përgatitjet maksimale për zbatimin e përpiktë të të gjitha rekomandimeve higjienike, distancore dhe të mbrojtjes personale përgjatë gjithë periudhës së pandemisë. Ju lutemi, secili nga Ju, studentë të dashur e staf i nderuar, kujdesuni për higjienën personale, mbajtjen e distancës, ajrosjen e ambienteve, kohëzgjatjen e reduktuar të leksioneve, përqendrimin me efikasitet në leksione, si dhe bashkëpunimin dhe mirëkuptimin mes vete për këto situata emergjente.

UEJL-i e ka trajtuar rrezikun shëndetësor në situatat pandemike me seriozitetin maksimal. Që në mesin e marsit 2020, draftuam protokollet, zbatuam rekomandimet e autoriteteve shëndetësore, zhvendosëm mësimdhënien nga prezenca fizike në distancë, organizuam sesionet e provimeve në format të kombinuar (hybrid mode), mbrojtjen e diplomave, tezave dhe projekteve, dhe të gjitha këto, pjesërisht nga distanca e pjesërisht me prezencë fizike. Deri më tani ia dolëm me shumë sukses. Do t’ia dalim edhe më tej dhe krejt kjo me qëllim që ta ruajmë shëndetin, cilësinë dhe vlefshmërinë e diplomave tona. Kur kjo situatë do të kalojë, ne duhet të dëshmohemi se dijet e nxëna janë valide dhe ekuivalente me certifikimin e dhënë për programet akademike.

Muajt korrik dhe gusht, për botën akademike pothuajse janë pushime të rehatshme, por sivjet kjo nuk ishte për UEJL-in. Në korrik, në një ditë të plotë trajnimi, të gjithë stafit akademik iu ndanë detyrat për tu përgatitur për sfidat e shtatorit-një fillimviti akademik krejtësisht ndryshe, në kushte të koronavirusit! Muaji gusht, vazhdoi me tre ditë trajnime shtesë-me fokus në përgatitjet për ngritjen e cilësisë në mësimdhënie e nxënie përmes formave interaktive, zgjidhjes së problemeve dhe detyrave në klasa dhe nga distanca, njëkohësisht, pra në formatin e kombinuar. E falënderoj stafin për vigjilencën dhe mirëkuptimin për përgatitjet e asaj që po na pret! Në mbështetje të plotë ishte edhe Bordi i ri i sapokonstituar i UEJL-it, për çka i falënderoj pa masë për mbështetjen dhe lirinë akademike që na e krijon!

Të gjithë studentët që janë afër kampuseve në Tetovë dhe Shkup, i kanë kushtet ideale hapësinore, teknike, infrastrukturore dhe mjedisore për të qenë prezent në klasa me plotësim të plotë të rekomandimeve shëndetësore, ndërkohë që të gjithë ata që nuk do ndjehen mirë me shëndet, janë në distanca të konsiderueshme dhe posaçërisht ata jashtë vendit, do të munden në kohë reale ta ndjekin mësimdhënien nga distanca. Tani për tani, evidencat tona (anketa e realizuar e studentëve në korrik), dëshmojnë se 2/3 e studenteve preferojnë mësimin me prezencë fizike dhe rreth 1/3, do  ta ndjekin atë nga distanca. Për këtë UEJL-i dhe departamenti i IT-së përgatitën pajisjet e nevojshme (kamera specifike), për ta mundësuar këtë. I falënderoj pa masë, posaçërisht departamentin e IT-së dhe atë të planifikimit operativ akademik.

Stafi akademik me ndërgjegje dhe integritet të lartë, i vetëdijshëm për moton tonë ,,studenti në qendër të shërbimeve/vëmendjes”, me liri të lartë akademike, por edhe me llogaridhënie permanente, do të menaxhojë procesin e mësimdhënies dhe nxënies në mënyrën më të mirë të mundshme. Devotshmëria dhe ndihma Juaj, të dashur studentë, në këtë përpjekje, është shumë e rëndësishme për t’ia dalë së bashku. Unë i besoj shumë këtij përkushtimi dhe për çfarëdo që konsideroni se nuk funksionon si duhet, Ju lutem na e adresoni. Ne jemi qenie humane, si edhe Ju, mbase disa dallojmë konsiderueshëm në moshën madhore, por në mentalitet jemi shumë afër. Përdorimi i teknologjive informatike, platformat tona elektronike, shërbimet elektronike dhe programet on-line, fatmirësisht janë shumë më të vjetra për UEJL-in se koha e sfidës së korona virusit!

Kur t’i kthehemi normalitetit ,,të vjetër,” asgjë s’do jetë krejtësisht si më parë. Prej çdo sfide dhe krize dilet me inovacione, dije dhe praktika të reja që edhe vet s’do duam t’i zbatojmë tërësisht si më parë! Ndryshimet pozitive, do të mbeten të qëndrueshme duke i zhvilluar më tej. Ndoshta edhe sistemit tonë të arsimit të lartë iu desh një tsunami i tillë që të zgjohemi nga gjumi i tradicionales. Për ne, si UEJL, kjo situatë ishte vibracion, por për sistemin e arsimit të lartë në vend, e mbase edhe në regjionin e gjerë është një zhvendosje e thellë. Gjithnjë e më pak ligjërues do keni ex-katedra, sepse këtë e kërkoni Ju-gjenerata Z! Edhe ashtu mënyrat e mësimnxënies tradicionale, nuk u përshtaten gjeneratave Tuaja, që gjithnjë e më shumë preferojnë të mësojnë duke lexuar gjithnjë e më pak, posaçërisht gjërat që nuk i preferoni shumë! Këtu unë shohë edhe përfitimet nga kjo e keqe e përbashkët që i ndodhë njerëzimit gjithandej.

UEJL-i edhe sivjet, falë përkushtimit të lartë të gjithë të punësuarve, si atyre akademik ashtu edhe shërbimeve administrative dhe mbështetëse, edhe përkundër të gjitha trendëve rrënëse popullative (natalitetit rrënës, emigracioni rritës, kërkimi i cilësisë dhe standardeve Perëndimore,...), për herë të tretë radhazi jo vetëm që ka dëshmuar stabilitet, por edhe rritje të numrit të studentëve, posaçërisht në disa programe studimore, që i kërkon dhe i ka dëshmuar tregu i punës, jo vetëm në vend! Bile konkursi i studimeve të ciklit të tretë nuk nevojitet të ri-hapet së dyti dhe mesatarisht në shkallë të Universitetit më shumë se katër aplikantë konkurrojnë për një vend të lirë për studime të doktoraturës.

Në fund, dëshiroj të vazhdojmë të mbetemi interaktiv dhe mbi të gjitha shëndoshë!

Na prift e mbara në këtë rrugëtim të përbashkët!

Rektori,

Akad. Prof. Dr. Abdylmenaf Bexheti

Google+