Над 100 научни трудови на 6. меѓународна научна конференција за бизнис и економија

Главни говорници на конференцијата беа познатите меѓународни експерти: проф. Лео –Пол Дана, ICD Business School of Paris, Groupe IGS, Франција, д-р Леон Ајзен, иноватор и претприемач во GSD Venture Studios, GVI Ventures и Network VC, како и проф. Андреа Капуто, професор на Универзитетот во Тренто, Италија и на Универзитетот Линколн, Обединетото Кралство.

Конференцијата ја отвори ректорот на Универзитетот на Југоисточна Европа, акад. проф. д-р Абдулменаф Беџети, кој им се заблагодари на сите учесници, особено на истражувачите кои придонеле со своите трудови, кои се повеќе од 100, од различни области и теми.

„Со задоволство ве информирам дека денешната конференција има целосен меѓународен карактер, бидејќи никогаш досега не сме имале толку големо присуство на меѓународни истражувачи, не само со учество, туку и со конкретен придонес со научни трудови. Истражувањето на Универзитетот на Југоисточна Европа е една од главните цели во Универзитетската стратегија, каде што сме многу успешни“, рече меѓу другото ректорот Беџети.

Деканот на Факултетот за бизнис и економија, проф. д-р Хирије Абази - Алили воедно им се заблагодари на сите учесници и на сите вработени кои придонесоа за организација и непречено одвивање на Конференцијата.

„Нашата главна идеја за организирање конференции беше да се осврнеме на навистина актуелни теми, како што е темата на оваа конференција. Нашата цел отсекогаш била да се занимаваме со предизвикувачки и интердисциплинарни теми“, рече меѓу другото деканот Абази-Алили.

Во однос на организацискиот аспект и димензиите на конференцијата, како и податоците поврзани со постигнатите резултати на шесте досега организирани конференции, проф. д-р Веланд Рамадани се осврна во својство на организационен секретар на Конференцијата.

„Почетоците беа тешки, но конференцијата порасна по обем и учество, исто како што порасна и самиот Универзитет. Иновацијата на оваа конференција е што за прв пат научните трудови ќе бидат објавени во зборници на Springer во бизнис и економија индексирани во Scopus“, рече проф. Рамадани.

На пленарната седница презентираа главните говорници, проф. Лео-Пол Дана, на тема „Водење надвор од сегашната криза: еволуирачки парадигми“, д-р Леон Ајзен, на тема „Квантно деловно размислување: мапирање на идниот успех, денес“ и доц. д-р Андреа Капуто, на тема „Кое е влијанието на претприемништвото? Дискусија на состојбата и отворени прашања за одржливоста“.

Конференцијата се реализираше во 5 пленарни сесии на теми како што се: Економско закрепнување, консолидација и одржливост; Економија и финансии; Претприемништво, иновации и семеен бизнис; Менаџмент и маркетинг; Информациски системи, наука за податоци и вештачка интелигенција.