Јавна презентација за прогласување на Шар Планина за „заштитено подрачје“

На овој настан беше презентиран и проектот на Министерството - „Постигнување заштита на биолошката разновидност преку создавање и ефикасно управување со заштитените подрачја и интегрирање на биолошката разновидност во планирањето на намената на земјиштето“, кој се спроведува со поддршка на УНЕП, канцеларијата во Виена, а финансиски е поддржан од Глобалниот еколошки фонд (ГЕФ).

Ректорот на Универзитетот на Југоисточна Европа, проф. д-р Замир Дика, ги поздрави гостите. Во воведниот говор тој ја истакна важноста од вклучување експерти од универзитетите во секоја иницијатива која се однесува на проекти и активности кои се посветени на пошироката заедница на граѓани .

„Прогласувањето на Шар Планина за национален парк треба да се разбере како намера за обезбедување развој и за унапредување на целокупната состојба и на потенцијалот на нејзините природни вредности, но, исто така, и за обезбедување правилно управување и одржливо искористување“, рече министерот за животна средина, Нурхан Изаири.

Меѓу другите на настанот присуствуваа и Теута Арифи, градоначалничка на Општина Тетово, Томас Мајкл Баер, амбасадор на Австрија, претставник од канцеларијата на УНЕП во Виена, Пјер Карло Сандеи и други видни претставници од научната јавност, градоначалници и претставници на општините кои гравитираат кон оваа подрачје, претставници на невладини организации и медиуми.

Настанот беше организиран со цел сите засегнати страни, уште во раната фаза, да се вклучат во активностите што ги преземаат Министерството и Владата на Република Македонија во однос на заштитата на Шар Планина.

Пред официјалното започнување на настанот ректорот Дика имаше работна средба со министерот Изаири.