Prezantim publik për shpalljen e Malit Sharr “zonë e mbrojtur”

Në këtë ngjarje u prezantua projekti i Ministrisë në fjalë, me titull: “Arritja e mbrojtjes së llojllojshmërisë biologjike përmes krijimit dhe menaxhimit efektiv me zonat e mbrojtura dhe integrimit të llojllojshmërisë biologjike në planifikimin e përdorimit të tokës”, që po zbatohet me mbështetjen e UNEP Vjenë me mbështetje financiare të Fondit Ekologjik Global (FEG).

Rektori i Universitetit të Evropës Juglindore, Prof. Dr. Zamir Dika, në fjalimin e rastit e theksoi rëndësinë e përfshirjes së ekspertëve universitarë, në çdo nismë që ka të bëjë me projekte dhe aktivitete, të cilat i dedikohen një komuniteti më të gjerë të qytetarëve.

“Shpallja e Malit Sharr për park nacional, duhet të kuptohet si qëllim për sigurimin e zhvillimit dhe avancimit të tërë gjendjes dhe potencialit të vlerave natyrore, por gjithashtu edhe sigurimit të menaxhimit të drejtë dhe përdorimit të qëndrueshëm”, tha ministri i Mjedisit Jetësor, Nurhan Izairi.

Në këtë aktivitet mori pjesë kryetarja e Komunës së Tetovës, Teuta Arifi, Tomas Majkll Baer, ambasador i Austrisë, përfaqësuesi i Zyrës së UNEP-it në Vjenë, Pjerr Karlo Sandei, ekspert të fushës, përfaqësues të komunave të cilët gravitojnë drejt kësaj zone dhe përfaqësues të organizatave joqeveritare.

Ngjarja u organizua me qëllim që të gjitha palët e përfshira, që në fazën më të hershme të kyçen në aktivitetet që i ka ndërmarrë Ministria dhe Qeveria e Maqedonisë në lidhje me mbrojtjen e Malit Sharr.

Vlen të theksohet se paraprakisht u zhvillua një takim pune midis rektorit Dika dhe ministrit Izairi.