Се одржа инаугурацијата на новиот ректор на УЈИЕ, проф. д-р Садудин Ибраими

Во своето поздравно обраќање, претседателот на Одборот на УЈИЕ, проф. д-р Клаус Тотерман, истакна дека пред да се прегрне иднината, неопходно е да се изрази длабока благодарност кон досегашниот ректор, акад. проф. д-р Абдулменaф Беџети. Тој нагласи дека Беџети го водел Универзитетот со визија, интегритет и непоколеблива посветеност кон академската извонредност, зацврстувајќи ја неговата позиција како значаен регионален центар на високото образование, кој промовира иновации, инклузивност и меѓународна соработка. Тотерман додаде дека изборот на проф. д-р Садудин Ибраими за нов ректор претставува важен момент за понатамошниот развој на институцијата и израз на довербата на Одборот и академската заедница во неговите лидерски способности.

Заменик-министерот за образование и наука, Лулзим Алиу, нагласи дека Министерството за образование ќе продолжи да го поддржува овој универзитет. „Убедени сме дека со вашето искуство, професионализам и посветеност, успешно ќе го водите универзитетот кон нови предизвици со тоа што ќе дадете приоритет на иновациите, дигитализацијата и вклучувањето на студентите во процесот на донесување одлуки. Министерството за образование и наука ќе продолжи да биде близок партнер на вашиот универзитет и на другите универзитети во земјава“, рече Алиу.

По примопредавањето на мандатот, поранешниот ректор, акад. проф. д-р Абдулменaф Беџети, изјави дека „денес е ден на предавање на штафетата“ и изрази уверување дека новиот ректор ќе го води Универзитетот кон уште посветли поглавја. Тој подвлече дека проф. Ибраими ги има докажано своите капацитети во текот на целото свое професионално делување и дека дополнително ќе ја динамизира развојната насока на Универзитетот, со поддршка од кадарот и од целата универзитетска заедница.

Во своето обраќање, новиот ректор, проф. д-р Садудин Ибраими, истакна дека ја презема оваа одговорност со длабока благодарност кон своите претходници и со јасна визија за понатамошно градење врз веќе воспоставената основа. Тој се обврза дека Универзитетот ќе продолжи со промислен и амбициозен развој, проширувајќи го своето влијание во високото образование во земјава и во регионов. „Да го изградиме заедно Универзитетот без граници, кој ги промовира вредностите на различноста, еднаквоста, одговорноста и служба кон општеството; универзитет кој развива не само знаење, туку и човечност“, истакна тој.

Церемонијата заврши со уметничка програма и продолжи со коктел, на кој присуствуваа гости од земјава и од регионов.