Fakulteti i Drejtësisë i UEJL-së në top tre skuadrat më të mira në Garat Mbarëkombëtare të Gjykimit të Simuluar në Tiranë

Ky ishte edicioni i katërt i garave të organizuara nga Fondacioni Halimi, me mbështetjen e Ambasadës së Holandës në Tiranë.

Në këtë edicion morën pjesë 16 skuadra nga fakultetet juridike të Republikës së Shqipërisë, Republikës së Kosovës dhe Republikës së Maqedonisë së Veriut.

Pas një përgatitjeje intensive disajavore dhe zhvillimit të tre raundeve të ballafaqimit verbal, skuadra e UEJL-së arriti me sukses të sigurojë vendin e tretë, duke u renditur ndër tre skuadrat më të mira të këtij edicioni.

Skuadra e UEJL-së u dallua për paraqitjen profesionale dhe performancën e shkëlqyer në të gjitha raundet e garës. Juria vlerësoi lart nivelin e argumentimit juridik, cilësinë e shkresave procedurale, prezantimin verbal, bashkëpunimin ekipor, si dhe gatishmërinë dhe profesionalizmin në përgjigjet ndaj pyetjeve të parashtruara nga juria dhe skuadrat kundërshtare.

Vlen të theksohet se kjo është hera e tretë radhazi që studentët e Fakultetit të Drejtësisë të UEJL-së marrin pjesë në këtë garë prestigjioze, ndërsa në vitin 2024 skuadra e UEJL-së ishte triumfuese e vendit të parë.

Ky sukses dëshmon përkushtimin e Fakultetit të Drejtësisë të UEJL-së në përgatitjen akademike dhe praktike të studentëve, duke krijuar kushte dhe mundësi që ata të zhvillojnë aftësitë profesionale, mendimin kritik dhe kompetencat juridike në nivel konkurrues ndërkombëtar.