Делегација од Mid Sweden University во посета на УЈИЕ: дискутирани заеднички студиски програми и нови можности за мобилност

За време на посетата, шведската делегација одржа низа состаноци со претставници на УЈИЕ, на кои присуствуваше и ректорот на УЈИЕ, проф. д-р Садудин Ибрахими, заедно со менаџментот и академскиот кадар на универзитетот.

На состанокот со проректорот за планирање, истражување и претприемништво, проф. д-р Веланд Рамадани, беа разгледани можностите за развој на заеднички студиски програми (Joint Degrees и Double Degrees) во рамките на работниот пакет WP3 од алијансата ChallengeEU. Се дискутираше за можноста за создавање заедничка диплома во областа на претприемништвото и иновациите, како значаен чекор кон проширување на меѓународната академска понуда.

Посебен состанок беше одржан со раководителот на Канцеларијата за меѓународни односи, Бујар Синани, каде беа презентирани можностите за мобилност на студентите и академскиот кадар, како и услугите и програмите што ги нуди УЈИЕ во рамките на меѓународната соработка.

Во вториот ден од посетата, делегацијата на MIUN и претставниците на УЈИЕ одржаа одделни состаноци во Амбасадата на Шведска во Скопје со амбасадорот на Шведска во Северна Македонија, Ола Солстром, како и со еден од основачките партнери на Шведско-Македонската стопанска комора. На овие средби беше нагласена важноста на успешната соработка меѓу MIUN и УЈИЕ во рамките на Европската универзитетска алијанса ChallengeEU, како и заедничката амбиција за развој на иновативни студиски програми во областа на претприемништвото и иновациите.

Соработката меѓу двата универзитета претставува одличен пример за академско и институционално поврзување, создавајќи нови можности за студентите, академскиот кадар и бизнис заедницата.