Në UEJL u mbajt konferenca doktorale e Gjuhës dhe Letërsisë Shqipe dhe Angleze

Sipas dekanit të Fakultetit të Gjuhëve, Kulturave dhe Komunikimit të Universitetit të Evropës Juglindore (UEJL), prof. dr. Demush Bajrami, tha se kjo është një mundësi e mirë që përmes diskutimit të arrihet deri tek premisa bazë e punës shkencore, që është origjinaliteti i çdo disertacioni të doktoratës, gjithnjë në përputhje me Rregulloren e studimeve të Ciklit të tretë dhe standardeve bashkëkohore që zbaton UEJL rreth të shkruarit të punimeve të doktoratës.

“Studentët tanë të doktoraturës arritën të demonstrojnë një kuptim sistematik për fushën e tyre të studimit, duke zotëruar aftësitë dhe metodat e kërkimit në atë fushë. Ata, treguan shkallën e nevojshme të integritetit akademik në punën origjinale, që është një arritje për zgjerimin e kufijve të dijes dhe një referencë e nivelit ndërkombëtar. Kjo, para së gjithash, tregon se këta kandidatë janë të aftë për analizë kritike, vlerësim dhe sintezë të ideve të reja dhe komplekse, të gatshëm për t’i transferuar ato tek kolegët, komuniteti i gjerë akademik dhe shoqëria në tërësi. Fundja, e gjithë kjo tregon se studentët e doktoraturës në UEJL, janë në gjendje të promovojnë progresin teknologjik, social ose kulturor”, tha dekani Bajrami.