UEJL dhe USHT nënshkruajnë marrëveshje bashkëpunimi

Udhëheqësit e dy universiteteve, mes tjerash janë pajtuar që të bëjnë shkëmbimin e kuadrit arsimor në bazë të një marrëveshjeje të veçantë, të organizojnë dhe zbatojnë projekte të përbashkëta hulumtuese, si dhe të shkëmbejnë informacione lidhur me rezultatet nga hulumtimet. Gjithashtu,  në fokus është edhe bashkëpunimi i studentëve dhe i organizatave studentore në fushat akademike, kulturore dhe aktivitetet sportive.

“Nënshkrimi i Marrëveshjes është një hap i madh jo vetëm për dy universitetet tona, por edhe për mbarë arsimin sipëror në gjuhën shqipe në Republikën e Maqedonisë”, deklaroi pas nënshkrimit të marrëveshjes rektori i UEJL-së, akademik Alajdin Abazi.

Rektori i USHT-së, Prof. dr. Agron Reka, deklaroi se me Marrëveshjen, përfundimisht do të rregullohen më shumë aspekte të bashkëpunimit të ndërsjellë në mes të dy universiteteve, në radhë të parë, avancimi i kushteve dhe i ofertave për studim dhe punë për studentët dhe profesorët tanë.