Login

Anëtarët e stafit duhet të përdorin llogarinë e tyre Webmail për identifikim.

Universiteti i Evropës Juglindore
jetëso dijen tënde!

Bujar Osmani: UEJL shtylla kryesore e ekspertizës në procesin e integrimit të Maqedonisë së Veriut

“Ju si universitet më evropian jeni shtylla kryesore e ekspertizës në procesin e integrimit të Maqedonisë së Veriut në BE”, kështu tha zëvendëskryeministri i Qeverisë së RMV-së i angazhuar për Çështjet Evropiane, Bujar Osmani, të enjten (16 maj 2019), gjatë ligjëratës për studentët e Universitetit të Evropës Juglindore në Tetovë, me temë “Integrimi në BE". Ai, tha se paraprakisht ka realizuar një takim me rektorin Akad. Prof. Dr. Abdylmenaf Bexheti, me të cilin ka biseduar për angazhimin e ekspertëve si resurse kryesore në ekipet profesionale, duke çmuar lartë ekspertizën e kuadrit të Universitetit të Evropës Juglindore.

Zëvendëskryeministri Osmani e prezantoi edhe projektin e Sekretariatit për realizimin e garës në ese të titulluar “Nëpërmjet dijes në kryeqendrën evropiane” , e cila do të zhvillohet në të gjitha universitetet publike dhe privato-publike, siç është UEJL, ku nga secili universitet, do të zgjidhen nga dy studentë që do të vizitojnë institucionet evropiane në Bruksel dhe Strasburg.

“Integrimi i plotë i vendit tonë në BE, nuk është opsion, por proces i domosdoshëm. Vetëm integrimi në BE, mund të ndal ikjen masive të popullatës. Ky fenomen është i lidhur me njëri – tjetrin në mënyrë inverse, në kuptimin që sa më afër integrimit është vendi, aq më tepër ulet shkalla e emigrimit dhe anasjelltas”, tha rektori Bexheti, në fjalimin e tij.

“BE-ja nuk duhet të ngurojë në procesin e zgjerimit, sepse zhvillimet e fundit gjeostrategjike në Ballkan tregojnë për një rritje të ndikimeve politike dhe ekonomike nga vendet e lindjes, si Rusia dhe Kina. “, tha mes tjerash rektori Bexheti.

Në cilësinë e ligjëruesit të lëndës, foli prof. Bekim Nuhiu, kurse ligjërata u moderua nga prodekania e Fakultetit Juridik Arta Selmani.

Google+