Shënohet Java Botërore e Gjuhës Italiane

Në këtë manifestim promovues morën pjesë studentë të degës së gjuhës italiane, prorektorja për hulumtime dhe marrëdhënie ndërkombëtare, Prof. Dr. Besa Arifi, ambasadori italian në Maqedoni, Sh.T. Karlo Romeo.

Para fillimit panelit, ambasadori italian, Karlo Romeo, realizoi një takim me prorektoren për hulumtime dhe marrëdhënie ndërkombëtare, Prof. Dr. Besa Arifi. Në këtë takim u diskutuan çështje të interesit të përbashkët, si dhe mundësitë për thellimin e bashkëpunimit ndërmjet të dy palëve.

Në fjalimin e saj të rastit, prorektorja për hulumtim dhe marrëdhënie ndërkombëtare, Prof. Dr. Besa Arifi, e veçoi faktin se Universiteti i Evropës Juglindore,me shumë seriozitet e ka marrë përparësinë e përdorimit të më shumë gjuhëve në komunikim.

“Përveç gjuhëve zyrtare të Universitetit, Qendra e Gjuhëve ofron kurse të mësimit edhe të gjuhëve të tjera të rëndësishme dhe se aspirojmë që studentët tanë të jenë të shkëlqyeshëm në gjuhën italiane, gjermane, frënge, spanjishte, turqishte, etj. Në emrin tim dhe në emër të rektorit, Akad. Prof. Dr. Abdylmenaf Bexheti, dëshiroj ta falënderoj ambasadën italiane në Maqedoni në përkrahjen e vazhdueshme që na e jep në mësimin dhe kultivimin e gjuhës italiane në Universitetin tonë”, tha mes tjerash prorektorja Arifi.

Ambasadori italian Karlo Romeo, në fjalimin e tij para studentëve, foli për rëndësinë e shënimit të javës botërore të gjuhës italiane, duke thënë se ky është edicioni i 18-të i tij dhe se këtë vit mbi 130 ambasada dhe konsullata italiane, në mbarë botën, po e shënojnë këtë javë.

“Ambasada italiane eshte e interesuar që të thellojë bashkëpunimin jo vetëm me UEJL-në, por edhe me institucione tjera, sepse ne këtë pjesë të Maqedonisë ekzistojnë parakushtet për ta shtrire bashkëpunimin”, tha ambasadori Romeo.

Тë udhëhequr nga profesoresha e gjuhës italiane, Viktorija Elenova, eksperiencën e tyre me gjuhën dhe kulturën italiane, e treguan studentët: Zihra Abazi, Veli Adili dhe Burhan Pajaziti, nga Fakulteti i Biznesit dhe Ekonomisë, - Aleksandar Shopovski, MA në telekomunikime në Politeknikun e Torinos, Vokrim Demiri, i diplomuar në shkencat politike dhe ekspert në sektorin e biznesit dhe Gzime Fejzi, afariste, aktive në promovimin e ndërmarrësisë tek femrat në Maqedoni.