Akademia e Biznesit dhe Industria së bashku në tregun e punës

Këshilli drejtues i Akademisë së Biznesit, të hënën (4 shtator 2017), mbajti mbledhjen e parë, në të cilën u diskutuan aktivitetet e ardhshme të akademisë dhe u prezantua informata lidhur me programet e specializuara që këtë vit ofrohen nga Universiteti i Evropës Juglindore . Në cilësinë e anëtarëve të këshillit drejtues, të pranishëm ishin pronarët e bizneseve më të njohura të rajonit dhe përfaqësuesit e Fakultetit të Biznesit dhe Ekonomisë dhe të menaxhmentit të Universitetit.

Rektori i UEJL-së, Prof. Dr. Zamir Dika, u shpreh mirënjohës për praninë e pronarëve të bizneseve, duke e vendosur theksin në bashkëpunimin konkret për realizimin e programeve të specializuara, të krijuara enkas për nevojat e industrisë.

Dekani i Fakultetit të Biznesit dhe Ekonomisë, Prof. Dr. Izet Zeqiri, prezantoi rregulloren e punës së Akademisë dhe projekt-planin e veprimit, ku i veçoi disa nga objektivat kryesore që synon t’i arrijë ajo.

Mësimdhënia e bazuar në hulumtim, trajnim për menaxhimin e biznesit, mbështetje të hulumtimit nëpërmjet TI-së, nxitjen e bashkëpunimit mes FBE-së dhe bizneseve dhe hartimi i projekteve të përbashkëta janë disa nga objektivat, të cilat synon t’i arrijë Akademia e Biznesit e UEJL-së.

Akademik Abdylmenaf Bexheti, theksoi rëndësinë e bashkëpunimit të universitetit me industrinë në aspektin e realizmit të projekteve të përbashkëta. Ai propozoi bashkimin e ideve dhe hartimin e një projekti të përbashkët, për të cilin mund të gjenerohen fonde nga fondet e ndryshme të BE-së.

Përfaqësuesit e bizneseve u shprehën të gatshëm të inkuadrohen dhe të bashkëpunojnë me universitetin dhe së shpejti do të ofrojnë edhe ide konkrete.

Informacionin lidhur me studimet e specializuara e prezantoi eksperti gjerman Prof. Dr. Norbert Marks, i cili i veçoi aspektet kryesore të funksionimit të këtyre programeve duke sjellë përvojën gjermane në këtë drejtim.

Shumica e pronarëve të bizneseve u shprehën të gatshëm të bashkëpunojnë dhe u la një kornizë kohore për dhënien e propozimeve konkrete dhe seleksionimin e kuadrit të tyre për të cilët kanë nevojë për specializime.