Panairi i karrierës mundësi për t’u kyçur në tregun e punës

Panairin e shpalli të hapur rektori i Universitetit të Evropës Juglindore, Prof. Dr. Zamir Dika, i cili tha se biznesi në Evropë gjithnjë ka punuar më së miri falë bashkëpunimit me universitetet dhe ekziston një numër i madh i arritjeve që mund të numërohen si shembull i arritjeve të përbashkëta.

“Kjo është arsyeja se pse Komisioni Evropian mundohet të rrisë numrin e të diplomuarve, të përmirësojë cilësinë e mësimdhënies dhe të sjellë deri në maksimum atë që arsimi i lartë mund të bëjë për të ndihmuar ekonominë e BE-së.”, tha mes tjerash rektori Dika.

Zëvendëskryeministri i Qeverisë së Maqedonisë për implementimin e Marrëveshjes së Ohrit, Dr. Festim Halili, tha se prania e tij në këtë panair e bënë të ndjehet nostalgjik, pasi edhe ai është njëri nga të diplomuarit e këtij universiteti. Halili, para studentëve tha se të rinjtë duhet të pajisen me aftësitë dhe njohuritë përkatëse, në mënyrë që ata të mund të konkurrojnë dhe të lulëzojnë në skenën botërore.

Përgjegjësja e Qendrës së Karrierës, Burbuqe Kaprolli, tha se ky panair ofron mundësi reale për bizneset dhe studentët, që të përfitojnë reciprokisht nëpërmjet punës praktike dhe punësimeve të drejtpërdrejta.

Në Panairin e karrierës morën pjesë mbi 50 kompani, të cilat prezantuan aktivitetet e tyre, kurse shumica e tyre e shfrytëzuan këtë rast për të krijuar kontakte me studentët, për angazhime dhe punësime të mundshme.