Aleanca Franceze në Tetovë shënon 25-vjetorin në UEJL

Në manifestim morën pjesë përfaqësues të institucioneve, komunitetit akademik dhe partnerë të Aleancës Franceze, si dhe Ambasadori i Francës në Maqedoninë e Veriut, Sh.T. Christophe Le Rigoleur.

Para fillimit të ceremonisë, Rektori i UEJL-së, Prof. Dr. Sadudin Ibraimi, së bashku me Prorektorin për Planifikim, Hulumtim dhe Ndërmarrësi, Prof. Dr. Veland Ramadani dhe Këshilltaren për Marrëdhënie me Komunitetin dhe Marrëdhënie Ndërkombëtare, Prof. Dr. Besa Arifi, zhvilluan takim me Ambasadorin Le Rigoleur. Në takim u diskutua për bashkëpunimin e deritashëm dhe mundësitë për avancimin e tij në fushën e arsimit, kulturës, gjuhës frënge, mobilitetit dhe bashkëpunimit ndërkombëtar.

Në fjalën përshëndetëse, Rektori Prof. Dr. Sadudin Ibraimi vlerësoi kontributin e Aleancës Franceze në promovimin e gjuhës dhe kulturës franceze, si dhe në forcimin e dialogut ndërkulturor dhe lidhjeve evropiane.

Manifestimin e hapi Kryetari i Aleancës Franceze në Tetovë, Dr. Avni Arifi, ndërsa Drejtoresha Mimoza Ceka paraqiti një retrospektivë të veprimtarisë 25-vjeçare të Aleancës dhe rolit të saj në promovimin e gjuhës, kulturës dhe vlerave frankofone.

Në kuadër të programit jubilar u zhvillua edhe një program kulturor, ndërsa urimet për këtë jubile u përcollën përmes videomesazheve nga drejtorët e mëparshëm të Aleancës Franceze në Tetovë.

Hapja e hapësirave të reja në Kampusin e UEJL-së shënon një kapitull të ri në bashkëpunimin ndërmjet dy institucioneve dhe krijon mundësi të reja për promovimin e gjuhës, kulturës franceze dhe bashkëpunimit ndërkombëtar.