Rektori Bexheti panelist për politikat fiskale dhe monetare në konferencën e organizuar nga Qeveria e RMV-së

Me këtë rast, rektori Bexheti, theksoi se historia fiskale e para një shekulli e deri më tani, duke përfshirë edhe krizën e fundit energjetike dhe inflatorike na dëshmojnë se pikërisht këto kriza të mëdha ekonomike janë shkak për përshpejtimin e reformave dhe jo e kundërta.

“Duke e patur parasysh gjendjen e sistemit ekzistues tatimor në RMV, që është shumë regresiv, me një bazë tatimore, ku dominojnë lehtësime dhe lirime tatimore, bazë jo mjaftueshëm konvergjente me sistemin tatimor të vendeve anëtare të BE-së, ku nuk ka zgjidhjet fleksibile për tatimimin të fitimeve të larta si rezultat i krizës, ku në mënyrë shumë të shprehur tatimohen të ardhurat nga pagat në raport me të ardhurat dhe fitimet kapitale, ku nuk ka zgjidhje tatimore ekologjike, ku ende shkalla e tatimimit digjital nuk u përgjigjet sfidave të kohës, ku furnizimet online nuk janë në mënyrë efektive nën kontroll dhe si të tilla ende gjenerojnë shkallë të lartë të ekonomisë joformale, reformat ekonomike janë të domosdoshme në pajtim me Koncepcionin dhe Strategjinë e miratuar para një viti.”, tha mes tjerash Rektori Bexheti.

Ai, pikëpamjet e tij, i prezantoi në panelin e tretë, ku theks të veçantë i kushtohej politikave fiskale dhe monetare në RMV.