Kryetari i Bordit të UEJL vizitoi Armeninë

Kryetari i Bordit të Universitetit të Evropës Juglindore, Prof. Dr. Denis Farington, nga 27 qershori deri më 2 korrik vizitoi Armeninë, duke vazhduar me pjesëmarrjen e tij në tre projekte: së pari në projektin e Këshillit të Evropës “Forcimi i integritetit dhe lufta kundër korrupsionit në arsimin e lartë në Armeni”, së dyti, po ashtu në projektin e Këshillit të Evropës mbi “Legjislacionin arsimor në Armeni” dhe së treti BE-Armenia, në projektin e binjakëzimit “Fuqizimi i nivelit terciar të arsimit të Armenisë për Integrimin e saj në Hapësirën Evropiane të Arsimit të Lartë”. Projekti i fundit, i cili udhëhiqej nga ekspertë finlandez dhe gjermanë, ishte me ftesë të DAAD-it (Shërbimit gjerman për këmbim akademik). Gjatë qëndrimit në Armeni, në kuadër të Këshillit të Evropës, Prof. Farington e përfundoi raportin për Kodin e etikës, të cilin ia prezantoi personalisht ministrit të Arsimit dhe Shkencës së Armenisë, z. Levon Mkrtchyan. Në margjina të takimeve u mbajt edhe një konferencë për gazetarë. Prof. Faringtoni kryesoi edhe me seancat e grupit të punës, ku u diskutua për projektin e fundit të Ligjit të ri të arsimit të lartë. Të pranishëm, po ashtu ishin edhe ambasadorët e BE-së, Finlandës dhe Gjermanisë. Puna për reformat në arsimin e lartë do të vazhdojë.