U ndanë shpërblimet për ese më të mirë për vitin 2016

Të premten (4 mars 2016), në hapësirat e Korpusit të Paqes në Shkup, u mbajt Ceremonia e dhënies së çmimeve në garën për ese më të mirë në Maqedoni, që organizohet për të katërtën herë me radhë, në partneritet midis Qendrës së Gjuhëve të UEJL-së, Shoqatës kombëtare të profesorëve të gjuhës angleze (ELTAM) dhe Korpusit të paqes në Maqedoni. Certifikatat u ndanë nga ambasadori i SHBA-së, Shkëlqesia e Tij, Xhes Bejli, i cili duke shprehur kënaqësinë e tij lidhur me këtë garë të nivelit kombëtar, ka falënderuar Universitetin e Evropës Juglindore për mbështetjen dhe kontributin në promovimin e mësimit të gjuhës angleze në vend dhe pjesëmarrjen në ngjarje të këtilla. Besa Bytyqi, e cila e përfaqësoi Qendrën e Gjuhëve të UEJL-së, u ndau fituesve shpërblime. Nxënësit nga shkollat publike dhe private në Maqedoni shkruan ese në temën: "Cila është rëndësia e vullnetarizmit në vendin tuaj dhe ndikimi i saj në botë?"

"Është e rëndësishme që ne po i bashkojmë njerëzit nga mjedise të ndryshme për të punuar drejt një qëllimi të përbashkët. Kjo i sjell njerëzit së bashku. Vullnetarizmi promovon rritjen personale dhe vetërespektin. Ju mund të bëni ndryshime, pasi që çdo njeri ka vlerë", tha mes tjerash në fjalimin e saj në këtë ngjarje, Besa Bytyqi.