Në UEJL ndahen diplomat DELF dhe DALF

Të mërkurën (10 nëntor 2010), në Universitetin e Evropës Juglindore në Tetovë, u ndanë diplomat e ashtuquajtura DELF dhe DALF, të cilat dëshmojnë njohjen e gjuhës frënge dhe që jepen nga Ministria e Arsimit e Francës. Në ceremoninë e organizuar në UEJL, për herë të dytë me radhë, morën pjesë ambasadori i Francës në Shkup, Jean-Claude Schlumberger, rektori i UEJL-së, Prof. dr. Zamir Dika, përfaqësues të Qendrës kulturore franceze në Shkup, përfaqësues të Aleancës franceze në Tetovë si dhe të diplomuar, nxënës, studentë dhe familjarë. Provimet për marrjen e diplomave DELF dhe DALF organizohen nga Aleanca franceze e Tetovës dhe mbahen në lokalet e Universitetit të Evropës Juglindore në Tetovë.