Ambasadori i Francës vizitoi UEJL-në

Ambasadori i Francës në Maqedoni, Sh.T. Kristian Timonier (Christian Thimonier), të premten (21 tetor 2016), vizitoi Universitetin e Evropës Juglindore në Tetovë. Ambasadorin Timonier e priti prorektori për marrëdhënie ndërkombëtare, Prof. Dr. Blerim Reka, i cili bëri një retrospektivë të arritjeve të Universitetit, duke potencuar pozitën aktuale dhe synimet për të ardhmen. Në veçanti, u bisedua për projektet e zhvilluara deri më tani dhe mundësitë e vazhdimit të bashkëpunimit në realizimin e projekteve të përbashkëta, duke përfshirë ardhjen e profesorëve francez dhe mundësinë e realizimit të punës praktike të studentëve të UEJL-së në kompanitë e njohura franceze.

Pas këtij takimi, prorektori Reka dhe ambasadori Timonier morën pjesë në ngjarjen e organizuar në bashkëpunim me Aleancën Franceze të Tetovës, ku merrnin pjesë prindër, mësues, drejtorë shkollash dhe nxënës të shkollave fillore dhe të mesme. Në këtë ngjarje, pjesëmarrësve iu ndanë diploma për njohjen e gjuhës frënge, që i jep Ministria e Arsimit e Francës.