Programi:

Informatikë biznesi (2022-2023)

Cikli i studimeve:	Cikli i dytë (Pasdiplomike)
Fakulteti:	Shkencat dhe Teknologjitë Bashkëkohore

Kodi i programit:	N-MBI60C
Viti akademik:	2022 / 2023
Titulli:	Magjistër në informatikë biznesi
SETK:	60 (1 vit) Akreditimi
Vendimi:	Vendimi për fillim me punë

Informatika e Biznesit është një disiplinë e njohur gjerësisht në Evropën Kontinentale. Edhe pse është e ngjashme me sistemet e informacionit, ajo më shumë fokusohet në çështjet teknike, duke përfshirë këtu sistemet informatike dhe qasjet strukturore për modelimin dhe analizimin e proceseve të biznesit dhe problemet lidhur me to. Informatika e biznesit është veçanërisht e rëndësishme në fushën e ekonomisë dhe mjedisit ndërmarrës. Ajo karakterizohet me bashkimet strategjike, outsourcing, mjedise operative të shpërndara fizikisht dhe partneritete globale të biznesit. Objektivi kryesor i këtij programi, do të jenë strategjitë e reja, teknikat, mjetet dhe teknologjitë për zhvillimin e një fushe të përshtatshme si informatika e biznesit. Kuptimi i biznesit dhe informatikës është e një rëndësie të madhe për punën e të gjithë profesionistëve të biznesit, duke përfshirë këtu edhe menaxherët ekzekutivë, të cilët e përcaktojnë drejtimin strategjik të organizatës, profesionistët e informacionit që hartojnë dhe ofrojnë shërbime të reja të informacionit; kontabiliteti dhe menaxherët financiarë, të cilët përdorin sistemet e informacionit për menaxhimin e financave dhe krijimin e raporteve të biznesit dhe menaxherët e marketingut e të shitjes, të cilët përdorin sistemet e informacionit për të ndjekur blerjen e konsumatorit dhe për të promovuar produkte të reja. Informatika e biznesit është studim i teknologjisë së informacionit në kontekstin e biznesit. Informacioni është bërë burim kyç i biznesit që çon në krijimin e karrierave të reja për individët, të cilët e kuptojnë se si të veprojnë me informacionin. Këta "punëtorë të ditur" - njerëz të cilët e kuptojnë si ta ruajnë, ta rimarrin, ta analizojë dhe ta shpërndajnë informacionin - aktualisht kanë një karrierë premtuese dhe produktive, e cila i pret ata. Kjo baraspeshë, gjithashtu, pasqyron lidhjen ndërmjet përmbajtjes teorike dhe praktike të lëndëve të fituara përmes ligjëratave, udhëzimeve, seminareve, sesioneve në laboratorë kompjuterikë dhe vetëstudim. Njohuritë nga lëndët fitohen përmes metodave të ndryshme të përafrimit, duke i përfshirë sesionet e provimit, testet në klasë, ato tutoriale, detyrat individuale, punën në grup dhe prezantimet. Studentët, pritet të demonstrojnë aspekte të origjinalitetit dhe të shpikjes. Objektivi i programit është që t’i pajisë studentët me përvoja cilësore të studimit, të cilat do t’u ofrojnë atyre mundësitë më të mira për të kuptuar fushat e mbuluara dhe ta kuptojnë potencialin e tyre maksimal.

Me mbarimin e programit, të diplomuarit mund të gjejnë punë në fushat e zhvillimit të sistemeve, menaxhimit të projekteve softuerike, mund t’u bëhen mbështetje përdoruesve përfundimtarë të IT, të punojnë në programim dhe të jenë si analistë të sistemeve të biznesit. Për këtë arsye, personat që kanë jo vetëm aftësinë për të hartuar zgjidhje teknike të bazuara në kompjuter, por gjithashtu kanë mundësinë të njihen me mundësitë e TI-së nga një perspektivë e biznesit, do të kërkohen për punësim nga çdo organizatë. Studentët, do të pajisen me aftësitë e mëposhtme:

Të menaxhojnë informacionin në organizata të mesme dhe të mëdha.
Të analizojnë, të planifikojnë dhe të zhvillojnë zgjidhje nga TI që mbështesin nevojat e tregut.
T’i planifikojnë analizat nevojshme të biznesit dhe vlerësimet e rrezikut të biznesit.
T’i zhvillojnë aftësitë, të kontribuojnë në marrjen e vendimeve, hartimin dhe zbatimin e ndryshimeve në procesin e biznesit.

Njohuritë dhe të kuptuarit

Njohuritë dhe të kuptuarit e fushave të biznesit dhe të informatikës (ekonomi, menaxhim, marketing, financa dhe përkatësisht, programim, bazat e të dhënave, sistemet kompjuterike dhe të informacionit, rrjetet dhe inxhinieria e të dhënave), në një nivel që shtrihet përtej njohurive themelore përmes njohurive elementare të orientuara në hulumtime dhe aftësi për të demonstruar ekspertizë në trajtimin e problemeve të botës reale në këtë fushë.
Aftësi për të zhvilluar dhe zbatuar ide origjinale dhe kreative në një mjedis që kërkon njohuri ndërdisiplinore, fusha të ndërlidhura të biznesit dhe informatikës dhe të tregojë kompetenca specialiste në të njëjtën mënyrë.

Aplikimi i njohurive dhe të kuptuarit

Në mënyrë origjinale, kritike, të pavarur dhe krijuese mund të zbatojë, të përdorë, të zhvillojë dhe të zgjidhë probleme në mjedise të reja dhe të panjohura në një kontekst shumëdisiplinor të një biznesi të vërtetë dhe në mjediset organizative.
Mund të planifikojë, të zbatojë dhe t’i vlerësojë çështjet e pavarura kërkimore në fushën e biznesit, duke zbatuar metoda dhe metodologji të ndryshme të zhvillimit të softuerit në bizneset komerciale.
Mund të përdorë një shumëllojshmëri të mjeteve të zhvillimit të softuerit dhe t’i programojë ato duke përdorur skripte shell dhe programe të hartuara për mjedise ueb ose programe të pavarura.
Në mënyrë origjinale, kritike dhe krijuese mund të marrë pjesë në procesin e zgjidhjes së problemeve në mjedise të reja, të papara ose të panjohura për zhvillimin e softuerit.
Është në gjendje t’i organizojë sistemet softuerike në mënyrë që të zgjidhë çështje të ndryshme sociale, ekonomike dhe/ose teknologjike.
Është në gjendje të marrë pjesë në projekte kërkimore, si një bazë për zhvillimin e mëtejshëm akademik.
Demonstron ekspertizë në trajtimin e problemeve reale në fushën e zhvillimit të softuerit dhe të menaxhimit të projekteve.
Mund të zhvillojë dhe të aplikojë ide origjinale dhe krijuese. Demonstron ekspertizë në trajtimin e problemeve reale në fushën e zhvillimit të softuerit dhe menaxhimin e projekteve.
Mund të zhvillojë dhe aplikojnë ide origjinale dhe krijuese.

Aftësitë për të vlerësuar

Në mënyrë adekuate mund të mbledhë, të analizojë dhe të vlerësojë të dhënat duke përdorur mjete dhe sisteme moderne për çështje të caktuara ekonomike dhe/ose informative dhe organizative, zakonisht nga perspektiva e menaxhimit dhe marketingut.
Mund të argumentojë ide dhe koncepte cilësore dhe sasiore me karakter biznesi dhe organizativ duke përdorur dhe duke zbatuar njohuritë e sistemeve të informacionit, bazave të të dhënave të korporatave dhe mjete të tjera softuerike.
Ka aftësi që në mënyrë adekuate të vlerësojë afatet e kërkuara, burimet dhe rreziqet në planifikimin, zhvillimin, vendosjen dhe mirëmbajtjen e softuerit, duke përdorur mjetet e duhura.
Mund të testojë, të vlerësojë dhe të vendosë mbi përshtatshmërinë e TI zgjidhjeve të mundshme në perspektivë komerciale.

Aftësitë e komunikimit

Ka aftësi që në mënyrë të qartë dhe pa ambiguitet t’u komunikojë rezultatet dhe njohuritë e studimit audiencave të specializuara nga fushat e biznesit dhe informatikës me shkathtësinë për ta përshtatur stilin dhe formën e të shprehurit për audiencë jo-specialiste.
Ka kompetenca për të kryer hulumtime në mënyrë kritike, krijuese, të pavarur dhe të argumentuar dhe për të vlerësuar metodologjitë dhe për të zhvilluar kritikat kur duhet të propozojë dhe të mbrojë hipoteza të reja.
Mund të demonstrojë aftësi për inicim, duke udhëhequr dhe duke marrë përgjegjësinë për një punë individuale dhe grupore, ku kompetencat e biznesit dhe informatikës janë vendimtare për llojin e pozitës.

Aftësitë e të mësuarit

Është në gjendje t’i identifikojë nevojat personale dhe drejtimet për studimin individual dhe autonom, siç mund ta kryejë atë në mënyrë të vetë-drejtuar dhe autonome në fushat e biznesit dhe informatikës.
Është në gjendje të marrë përgjegjësi për të mësuarit e vazhdueshëm individual dhe atë në grup, në fusha të specializuara të biznesit dhe të informatikës brenda ekonomisë në rrjet, duke përfshirë këtu edhe përcaktimin e objektivave të të nxënit afatmesëm dhe afatgjatë.

Semestri 1

[MCS-303] [6 SETK] Metodologjia e hulumtimit
Qëllimi i kësaj lënde është që studentët të fitojnë njohuri dhe të kuptuarit e teorive të ndryshme shkencore dhe metodologjitë. Fillimisht studentëve do t’u shpjegohen konceptet themelore dhe përkufizimet teorike dhe mostrat e të gjitha metodave ekzistuese të hulumtimit, hipoteza të drejtpërdrejta dhe indirekte, variablat, vlefshmëria e rezultateve, BIAS-i dhe paragjykimet, cilësia shkencore dhe metodologjitë sasiore të kërkimit dhe qasjet e tjera metodologjike. Për çdo kapitull, studentët, do të kryejnë edhe detyra praktike. Pas përfundimit me sukses të kësaj lënde, studentët do të jenë në gjendje: ta dinë dhe ta kuptojnë rëndësinë e koncepteve themelore shkencore; t’i mësojnë teknikat për hulumtim dhe kërkim efikas të informacionit dhe qasje efikase në informacione dhe literaturë relevante; t’i identifikojnë, t’i përshkruajnë dhe t’i formulojnë problemet shkencore; të bëjnë një zgjedhje të kujdesshme të qasjeve alternative kërkimore, të përshkruajnë me kujdes; të krahasojnë dhe të shpjegojnë avantazhet dhe disavantazhet e metodave të ndryshme shkencore për mbledhjen dhe analizimin e të dhënave në kërkime sasiore dhe cilësore; t’i aplikojnë metodat themelore shkencore për të analizuar të dhënat sasiore dhe cilësore; të sigurojnë korniza teorike themelore mbi të cilat do të ndërtohen kërkimet; t’i shqyrtojnë ato dhe të bëjnë një vlerësim të publikimeve teknike dhe atyre shkencore.
[MCBI-01] [6 SETK] Modelimi i proceseve të biznesit
Qëllimet e lëndës janë: Proceset paraqesin teknologjitë kryesore të të gjitha organizatave për prodhimin dhe shpërndarjen e produkteve dhe shërbimeve që kënaqin nevojat e konsumatorëve. Gjithnjë e më shumë, në mënyrë që të vazhdojë të ju shërbejnë klientëve të tyre dhe të mbeten konkurrues, organizatat duhet të vazhdimisht t’i analizojnë, ridizajnojnë dhe t’i përmirësojnë proceset e tyre të biznesit, në kohë më të shkurtër, për të arritur qëllimet operacionale. Duke e kuptuar këtë, procesi i integrimit të biznesit kërkon një infrastrukturë të TI-së që mundëson njerëzit, proceset dhe informacione të integrohet në mënyrë fleksibile. Kjo lëndë, do të shqyrtojë se si organizatat mund të modelojnë proceset e biznesit, si hap i parë në arritjen e proceseve fleksibile dhe të integruar të biznesit. Lënda, do të shqyrtojë teknologjitë e informacionit dhe arkitekturat që premtojnë për të bërë të mundur këtë integrim të proceseve të biznesit. Lënda do të pajisë studentët me: - Një kornizë për të kuptuar projektimin, kontrollin dhe përmirësimin e proceseve të biznesit. Pjesa më e madhe e këtij materiali, do të jetë nga fusha e menaxhimit të operacioneve. - Një metodologji për të analizuar, modeluar dhe dizajnuar proceset e biznesit, duke përfshirë përdorimin e simulimit për matjen dhe krahasimin e performancës së modeleve të ndryshme. - Njohja e teknologjive aktuale në zhvillimin e sistemeve të informacionit dhe arkitekturave, si lehtësuesit e përmirësimit, integrimit dhe automatizimit të procesit të biznesit.
[CM181] [6 SETK] E-Biznesi
Qëllimi i lëndës: Ndërmarrja e biznesit digjital, krijimi i modeleve të reja të biznesit, të arritura nga turbullira e botës digjitale dhe fizike, sillet rreth teknologjive që e bëjnë informacionin të përdorshëm dhe të lëvizshëm. Kjo lëndë përqëndrohet në ekosistemin digjital, bashkëveprimin midis botës fizike dhe asaj digjitale, për të eksploruar tendencat digjitale dhe risitë për bizneset. Raportet dhe diskutimet e industrisë përqendrohen në nxjerrjen e vlerës nga platformat digjitale për të adresuar strategjitë e biznesit. Temat përfshijnë: kornizat e modelimit të ndërmarrjeve, përdorimin e raporteve të industrisë së teknologjisë digjitale në krijimin e vlerës së biznesit, platformat dhe ndërfaqet e sistemit të ndërmarrjeve dhe kornizën e menaxhimit të projektit “Cikli i Jetës për Zhvillimin e Programeve (CKZHP)”.
[CM182] [6 SETK] Mbledhja, grumbullimi dhe menaxhimi i të dhënave
Qëllimi i lëndës: Rritja e përditshme e sasisë së të dhënave në dispozicion si pjesë e aktiviteteve të përditshme në biznes, shkencë, arsim, argëtim, etj, është bërë një shqetësim dhe fjalor i përditshëm. Përveç kësaj, nevoja për të punuar me vëllime të mëdha të të dhënave, aplikacionet aktuale gjithashtu sfidohen me të dhëna multi - modale, duke përfshirë të dhëna të pastrukturuara dhe gjysmë të strukturuara, të dhëna imazhe dhe video, të dhëna hapësinore dhe kohore, etj. Të gjitha këto të dhëna duhet të menaxhohen. Nevoja për të mbledhur, rregulluar, grumbulluar dhe në përgjithësi menaxhuar ato paraqet një shqetësim në baza ditore. Ky subjekt mbulon një pjesë të ciklit të jetës së të dhënave, përfshirë mbledhjen, grumbullimin dhe menaxhimin e të dhënave. Meqenëse shumica e të dhënave ruhen në baza të të dhënave, gjithashtu, do të shqyrtohen qasje të ndryshme inxhinierike në bazat e të dhënave, për të mbështetur menaxhimin e të dhënave, përfshirë mbledhjen, grumbullimin dhe mirëmbajtjen. Standardet e të dhënave, ruajtja cilësore e të dhënave dhe sfida e "grupeve të mëdha të të dhënave", gjithashtu, do të merren parasysh. Qëllimi tjetër i lëndës është shumëllojshmëria e sistemeve dhe teknikave të ruajtjes së të dhënave.
[6 SETK] Lëndë zgjedhore profesionale
- [MCBI3031] Inteligjenca e biznesit dhe analitika
  Qëllimi i lëndës është që të ju sigurojë studentëve një kuptim të disa teknikave të shkencës së menaxhimit dhe të ofrojë disa njohuri se si këto mjete mund të përdoren për të analizuar problemet komplekse të biznesit dhe të arrijnë në një zgjidhje racionale. Teknikat për të studiuar përfshijnë parashikimin, planifikimin linear, simulimin, dhe modelimin. Rastet e kompleksitetit në rritje do të përdoren për të theksuar përshkrimin e problemit, përkufizimin dhe formulimin. Kompjuteri, do të përdoret gjerësisht në të gjithë lëndën, kryesisht duke përdorur programe në dispozicion për të kryer llogaritjet pasi problemi është formuluar si duhet. Theksi do të vendoset në interpretimin dhe zbatimin e rezultateve. Përveç kësaj, ne do të shqyrtojmë të ardhmen e analitikës.
- [ECSIS-07] Analiza dhe dizajnimi i sistemeve
  Qëllimi i lëndës është që studentët të kuptojnë dhe të përdorin metodologjitë, teknikat, mjetet dhe perspektivat thelbësore për analistët e sistemeve që të hetohen dhe të zhvillohen me sukses kërkesat e sistemeve të informacionit, si dhe të jepen zgjidhje të përshtatura për kërkesat, duke përdorur teknika standarde të modelimit të tilla si teknikat e strukturuara të modelimit, teknikat e modelimit të inxhinierisë informatike dhe teknikat e modelimit të objekteve. Për më tepër, të kuptohen metodat dhe kufizimet e përfshira në krijimin e një dizajni të realizueshëm nga rezultatet e përdorimit të analitikës së sistemeve të përmendura më sipër.
- [ECSSE-01] Menaxhimi i projekteve të softuerit
  Qëllimi i kësaj lënde është t’u japë studentëve njohuri për mënyrën se si zhvillohet plani për menaxhimin e projekteve të softuerit për sisteme intensive softuerike; si të ngrihen mekanizma të monitorimit dhe të kontrollit; si të ndahen dhe të rivendosen burimet e projektit, si të ndiqet orari, buxheti, cilësia, produktiviteti dhe progresi; gjithashtu, korniza se si të planifikohet për fazën e instalimit dhe përkrahjes të ciklit jetësor të projektit. Ato njëherësh e kuptojnë rëndësinë e strukturës së projektit, planifikimin e burimeve dhe ekzekutimin, si dhe instrumentet e matjes së progresit. Përveç kësaj, ata do të kuptojnë raportet në mes sigurimit të cilësisë, menaxhimit të konfigurimit, verifikimit dhe validimit e testit dhe përcaktimit të vlerës. Njëherësh, ata do të kenë kuptim për çështjet kyçe në llogaritjen dhe përcaktimin e çmimit për njësi pune, motivimin e punëtorëve, udhëheqjen e ekipit të projektit dhe menaxhimin e cilësisë në përgjithësi.
- [EM555] Depozitimi i të dhënave
  Kjo lëndë do t’i pajisë studentët me njohuri më të thella për parimet e magazinave të të dhënave, teknikat e magazinimit të të dhënave dhe sistemet e inteligjencës së biznesit. Lënda prezanton temat e dizajnit të Magazinës së të dhënave, procesi i Ekstraktimit – Transformimit – Ngarkesës (ETL), Kubet e të dhënave dhe të ashtuquajturat Data Marts-at. Lënda përfshinë dizajnimin logjik të një magazine të të dhënave, nivelet (shtresat) e vendosjes së të dhënave dhe përpunimin ekstrakt – transformim – ngarkesë, përdorimin e analizave shumë – dimensionale, duke përdorur teknikat e OLAP dhe teknika të tjera. Gjithashtu, lënda do të eksplorojë se si të mbështetet vendimmarrja dhe nxjerrja e analizave dhe modeleve parashikuese. Studentët, do të krijojnë aplikacione të inteligjencës biznesit duke përdorur magazinën e të dhënave përmes OLAP dhe mjete tjera analitike.
- [ECSWMS-07] Teknologjitë e kalkulimeve në “Cloud”
  Kjo lëndë mbulon një sërë të teknologjive të fundit nga lëmi i “cloud computing”. Studentët, do të mësojnë se si të zhvillojnë aplikacione softuerike të bazuara në teknologjitë dhe platformat e ndryshme në Сloud. Gjithashtu, do të shpjegohen mënyrat e integrimit të shërbimeve në nivel të aplikacioneve të ndërtuara në Cloud platforma heterogjene, si dhe mënyrat e përdorimit të solucioneve “Platforma - si- shërbim” dhe “softuerët - si - shërbim” me qëllim të ndërtimit të aplikacioneve të biznesit në Cloud. Për shtresa të ndryshme të cloud teknologjive, zgjidhjet praktike si Google, Amazon, Microsoft, Salesforce.com, etj., do të përdoren, kurse aspekti teorik do të mbulohet duke përpunuar botime të hulumtimeve në këtë drejtim.
- [EM558] Sistemet e mëdha (ERP, CRM)
  Zhvillimi i sistemeve ERP gjatë dekadave të fundit ka qenë një nga përparimet kryesore në përdorimin e teknologjisë së informacionit nga organizatat. Qëllimi i kësaj lënde është të njoftojë studentët me sistemet softuerike të Planifikimit të Burimeve të Ndërmarrjeve (ERP) dhe rolin e tyre brenda një organizate. Gjithashtu, prezentohen konceptet kryesore të sistemeve të integruara të informacionit dhe shpjegohet pse sisteme të tilla janë të vlefshme për bizneset. Lënda, gjithashtu, do të sigurojë diskutim mbi raste të ndryshme biznesi në të cilat mund të aplikohen konceptet ERP.
- [ECSSE-03] Inxhinieria e kërkesave
  Kjo lëndë mbulon konceptet e krijimit, përkufizimit dhe menaxhimit sistematik me kërkesat e softuerit për sistemet e mëdha, komplekse, të ndryshueshme ku dominon pjesa softuerike. Procesi mbulohet nga ana teknike, organizative, si dhe nga perspektiva e menaxhimit, duke diskutuar paradigmat dhe metodologjitë e inxhinierisë së kërkesave që janë përdorur në të kaluarën, përdoren tash ose do të përdoren në të ardhmen. Këtu mbulohen qasjet informate, gjysmë-formale dhe formale, duke mbajtur baraspeshën ndërmjet teorisë dhe praktikës. Kjo nënkupton ndërtimin e modeleve njëherësh edhe të procesit të inxhinierisë së kërkesave edhe të produktit që është rezultat i këtij procesi, në lidhje me qëllimet/kërkesat/specifikimet funksionale dhe jo-funksionale, me përdorimin e një procesi sistematik të vendimmarrjes.
- [EM557] Bazat e administrimit të biznesit
  Kjo lëndë paraqet një hyrje të shumë aspekteve të sistemit dhe funksionimit të ndërmarrjeve private dhe të bizneseve të ndryshme. Lënda u mundëson studentëve që të kuptojnë më mirë se për çfarë bëhet fjalë në fushën e biznesit, si funksionon një biznes dhe cilat funksione biznesi janë të nevojshme në çdo ndërmarrje biznesi. Përveç kësaj, lënda siguron informacion në lidhje me forcat brenda mjedisit të biznesit, si dhe një hyrje në fushat kryesore funksionale brenda firmës, për shembull si marketingu, menaxhimi me operacionet e biznesit, kontabilitet, financa, menaxhimi me burimet njerëzore, etj.

Semestri 2

[CBI4010] [30 SETK] Punimi i magjistraturës
Ky modul u mundëson studentëve që të transferojnë aftësitë dhe njohuritë e tyre për kërkime dhe për të bërë detyrën më të ndërlikuar - punimin e magjistraturës. Moduli synon të jetë plotësisht praktik dhe studentët t’i fitojnë njohuritë e nevojshme, por edhe aftësitë dhe shkathtësitë që t'i qasen shkrimit të punimit. Moduli ka një rezultat kthyes - t'u mundësojë studentëve ta shkruajnë punimin e magjistraturës me vështirësi minimale dhe me një efikasitet maksimal. Lënda ka për qëllim përmirësimin e teknikave të hulumtimit dhe stilin e shkrimit të punimit, duke mbajtur llogari për ndalesën e shërbimit me mjete të palejuara, siç janë: plagjiatura dhe cenimi i të drejtave të autorit, që janë të ndaluara me Statutin e UEJL-së.

COVID-19 Information and Protocol

Shërbime online